Kostun víða farin að tíðkast

Já, það hefur orðið sífellt meira áberandi að stórfyrirtæki kosti hitt og þetta, sjónvarpsþætti, íþróttamót, listviðburði og fleira og fleira. Nú eru ýmsir farnir að taka þetta eftir forstjórunum og viðskiptaforkólfunum því orðrétt segir í frétt í DV í dag um ofbeldi og slys í Keflavík: „Sömu nótt kostaði skemmtanalífið tvö slys í bænum.“ Æ! hvað það er indælt að skemmtanalífið sé farið að kosta slys, enda eru þau ómissandi hluti af skemmtuninni. Vonandi verður framhald á þessu í Keflavík og ákjósanlegt að þessi frábæra nýjung berist til Reykjavíkur sem fyrst.

Karlhóran kemur

Að undanförnu hefur tímaritið Sirkus auglýst það grimmt að karlhóran Rob Schneider sé væntanlegur til landsins. Að sjálfsögðu ganga þeir síðan fram með góðu fordæmi og birta myndir af karlhórunni í hópi fáklæddra viðskiptavina. Nýtt skref hefur verið stigið í baráttunni gegn vændi og mér líkar það mætavel. Vændi ætti alls ekki að vera refsivert heldur kaup á vændi og refsingin auðvitað sú að birta mynd af viðskiptavinum fáklæddum á forsíðu tímarits og vændiskonan sem hann átti kaup við í bakgrunninum fullklædd. Haf kæra þökk Sirkusmenn fyrir skarpskyggnina og þessa beittu þjóðfélagsrýni.