Ilmur er í nefi þess sem finnur

Freyja litla velti sér upp úr úldnum fiski í göngutúrnum í dag. Hún rakst á þetta fína ýlduflak við Kópavogshöfn í dag og líkt og síðast þegar hún gerði þetta þá angar hún viðurstyggilega. Ég baðaði hana eftir að heim kom en fýlan er enn megn. Andri og Gunnur komu í mat og Freyja ræfilinn skildi ekkert af hverju enginn vildi hafa hana nálægt sér. Sjálfri fannst henni þetta fína náttúruilmvatn bæði spennandi og einstaklega ljúft. Því miður erum mannfólkið of heimskt til að skilja þetta. Freyja yppir bara öxlum og segir: Ef beauty is in the eye of the beholder þá er aroma in the nose of the smeller. Hún hefur bara þónokkuð til síns máls eða sagði ekki Forrest Gump: Stupid is as stupid does.

Skakki turninn Steingerður

Að undanförnu hef ég verið að leika mér að því að vera svolítið döpur. Það er eiginlega nauðsynlegt svona af og til að hætta gleiðgosahættinum og verða fúllyndur. Þegar þannig stendur á fyllist ég sjálfsvorkunn og meðal þess sem mér finnst sérlega ranglátt þessa stundina er: 1. Að ég skuli þurfa að vinna fyrir mér og geti ekki legið heima og lesið sakamálasögur og étið súkkulaði allan daginn. 2. Að súkkulaði skuli ekki vera hollusta sem nauðsynlega ber að leyfa sér á hverjum degi. 3. Að hús eru almennt ekki sjálfhreinsandi. 4 Að dætur finna ekki hjá sér náttúrulega hvöt til að þrífa fyrir mæður sínar og þvo alla þvotta frá því þær læra fyrst að standa í fæturnar.
Þetta hefur valdið mér ómældum hugarkvölum að undanförnu og ég er að verða eins og skakki turninn í Písa, ég er svo svakalega leið. Mér finnst að systur manns eigi að safna liði þegar svona stendur á og koma heim til manns og þrífa, taka til, þvo þvott, elda og dekra við mann.