Orðin móðursystir í sjöunda sinn

Sagt er að sjö sé heilög tala en ég varð móðursystir í sjöunda sinn rétt fyrir tvö í gær. Litli pilturinn sem þá fæddist hlýtur að verða sérstakur gæfumaður því hann er sjöunda systrabarn tveggja móðursystra sinna en það áttunda hjá hinum tveim. Svanhildur fæddi sem sagt þriðja barnið sitt þann 1. ágúst en Ólafur Steinar bróðir hans á afmæli núna 18. og verður þá ársgamall eða bókstaflega eldgamall.

Líkur sækir líkan heim

Aumingja Guðmundur hefur oft fengið að kenna á því að heita svona algengu nafni en um daginn rifjaðist upp fyrir mér sagan af klikkuðu kerlingunni sem ofsótti okkur og það hafði ekkert með nafnið hans að gera. Af einhverjum ástæðum var hún fullviss um að einhver Elliði Nordahl væri með þetta símanúmer og hringdi jafnt nótt sem nýtan dag. Við vorum orðin ansi þreytt á kerlu en hún var mismunandi illa drukkin en alltaf sannfærð um að ég feldi Elliða í skápum og skúffum íbúðarinnar og stæði í vegi fyrir að hún fengi að segja honum skoðanir sínar á líferni hans. Eitt sinn hringdi hún og hvæsti svo hátt að heyrðist norður á Sauðárkrók: „Er helvítis fávitinn heima?“ Ég var dauðsyfjuð og rétti því Guðmundi símann orðalaust. Hann skiptist á nokkrum orðum við kerlu sem skildi fljótt að þrátt fyrir að vera stundum tvöfaldur í roðinu þá var Gummi ekki Elliði. Þegar hann hafði lagt á sagði hann sármóðgaður: „Það er spurt um helvítis fávitann og þú réttir mér símann!“ Það varð fátt um svör hjá mér en ætli það nægi ekki að minna á að líkur sækir líkan heim.