Foreldraskelfandi leikföng

Elstu barnabörnin hennar mömmu eru þrír drengir, Steinar Örn, Andri og Atli. Mamma var að jafnaði mjög vinsæl hjá piltunum þegar þeir voru litlir því hún gaf þeim yfirleitt leikföng í jólagjöf og hið undarlega var að það voru byssur sem framleiddu hávaða, trommur eða önnur hljóðfæri og jafnvel smíðadót. Það var eiginlega ómögulegt að gera upp við sig hvort gamla konan gerði þetta til að gleðja barnabörnin eða ergja foreldrana. Sennilega hefur þetta tvennt blandast í hennar huga því eitt sinn er hún gaf Andra þroskaleikfang, sem samanstóð af pinnum sem raða átti í borð og reka þá síðan í gegnum það með hamri sem fylgdi, sagði hún: „Gefðu litlu barni hamar og veröldin verður einn stór nagli.“ Hún hreinlega ljómaði þegar hún sagði þetta en mér rann kalt vatn milli skinns og hörunds. Það kom líka á daginn að barnabarnið skildi mjög fljótt að það var margt í veröldinni sem var þess virði að berja á því. Kommóðan mín ber enn áverkana. En ástæðan fyrir því að ég rifja þetta svo vandlega upp hér er að Nanna Rögnvaldar vísar í grein á blogginu sínu um það hvernig einhleypt fólk getur náð sér niður á barnafólki með því að gefa börnunum vel valdar gjafir. Þeir sem hafa áhuga geta skoðað á www.nannar.blogspot.com.